Hezkuntzan hurrengo ikasturtea antolatzen ari dira, murrizketarik gabe

Rajoyren Exekutiboaren murrizketak ez dituztela aplikatuko berretsi du Isabel Celaak, murrizketek "zerbitzu publikoen kalitateari eragiten diotelako" eta euskal eskumenetan eskua sartzen dutelako.

2012-2013 ikasturteko irakasleen langileak "beti bezala" antolatzen ari direla ziurtatu du Isabel Celaa Jaurlaritzako Hezkuntza sailburuak, hau da, Madrileko Gobernuak onartutako murrizketak aplikatu gabe. Murrizketen kontra errekurtsoa aurkeztuko du Jaurlaritzak.

Horixe izan da Celaak Arantza Aurrekoetxea EAJko legebiltzarkideak egindako galderari emandako erantzuna. Jeltzaleak Hezkuntza Sailak murrizketen harian zer egiteko asmoa duen galdetu dio.

Horrez gain, Aurrekoetxeak "murrizketak" egin izana leporatu dio Celaari, eta murrizketa horiek ezkutatzeko "Rajoyren murrizketez" ez hitz egiteko eskatu dio.

'Txelis'ek uko egin dio EHUn parte hartzeari, biktimak ez iraintzeko

ETAko buruzagi ohiak esan du gustura parte hartuko zuela parte Udako Ikastaroen mintegian, baina ez dela bertan egongo, biktimak ez iraintzeko.

Jose Luis Alvarez Santacristina ('Txelis') ETAko buruzagi ohiak uko egin dio EHUko hitzaldian parte hartzeari. Euskal Herriko Unibertsitateko Udako Ikastaroen barnean, ''Bizitzeko Barkatu" izeneko mintegian zen parte hartzekoa 'Txelis'.

Jardunaldietako antolatzaileen gertuko iturriek jakitera eman dutenez, Txelisek bertan parte hartzeari uko egin dio, ohar baten bidez. Bertan azaldu duenez, ez du inor mindu nahi.
Ordu batzuk lehenago, gainera, espetxeetako iturriek jakinarazi dute 'Txelis'ek ez duela mintegi horretan egoteko baimen eskaerarik egin. Gobernuak ere partehartze horren kontrako jarrera agertu du arratsaldean.

Dozena bat autorekin talka egin duen gidari mozkor bat atxilotu dute

Mozkortuta zegoen 33 urteko gizonezko bat atxilotu dute Ortuellan aparkatuta zeuden dozena bat autoren kontra talka egin ostean.

Ertzaintzak 33 urteko gizonezko bat atxilotu du Ortuellako Lasagabaster Kalean aparkatuta zeuden autoen aurka talka egin ostean. Gertakaria goizaldeko 05:30 aldera gertatu da.

Bertaratutako ertzainek Renault Laguna batek karrozeria hondatuta zeukala konprobatu dute. Gidaria aparkatzen saiatzen zegoen bitartean inguruko autoen kontra talka egiten zuen.

Auto gidariari bi alkoholemia proba egin dizkiote: lehengokoan 0,71 miligramo eman ditu eta
bigarrenean 0,70. Atxilotzerakoan oso oldarkor agertu da, ertzainak iraindu eta patruila-autoaren leihatila bat hautsi du. Gidariak buruan ebakia egin eta laguntza medikoa jaso du.

Arrastoak aurkitu dituzte Polloen irekitako hirugarren hobian

EITBk jasotako informazioaren arabera, arrastoak Donostiako auzitegiko institutu anatomikoan aztertuko dituzte. Ondoren Madrilera bidaliko dituzte, proba gehiago egiteko.

Haur lapurtuen auziarekin ustez lotutako hirugarren hobia ireki zuten Donostiako Polloe hilerrian eta arrastoak aurkitu dituzte.

Hobia epaitegiaren aginduz ireki dute, eta, EITBk jasotako informazioaren arabera, zenbait arrasto aurkitu dituzte. Arrastoak Gipuzkoako hiriburuko auzitegiko institutu anatomikoan aztertuko dituzte. Ondoren, Madrileko Toxikologia Institutura bidaliko dituzte, proba gehiago egiteko.
Gaurko hilobia ireki aurretik beste bi ireki dituzte Polloen; bata, urtarrilean, Losa Ocariz familiak eskatuta, eta bestea, pribatua.

Moody's agentziak nota jaitsi die 16 bankuri eta 4 erkidegori

Besteak beste, Santander, BBVA, Banesto, Caixa Bank, Nafarroako Rural Kutxa, Popular eta Bankinter erakundeei jaitsi die kalifikazioa.

Moody's kalifikazio agentziak nota jaitsi die Espainiako 16 bankuri, tartean Santanderri eta BBVAri.

Kalifikazio agentziaren hitzetan, ''bankuek bere jardunerako dituzten kontrako baldintzak, Espainiaren kaudimen eskasa, aktiboen hondatze azkarra eta kapitalen merkatuetara heltzeko duten murrizketak'' dira jaitsieren arrazoiak.

Gainera, Kataluniaren, Murtziaren, Extramaduraren eta Andaluziaren notak ere jaitsi ditu

Europak, Grezia eurotik ateraz gero

Grezia eurotik ateratzeak "ez luke euroaren amaiera ekarriko", baina bai zailtasunek gora egitea, bai Grezian bertan eta bai eurogunean, Bruselako iturrien arabera.

Europako Batzordea eta Europako Banku Zentrala larrialdiko estrategi berri bat planteatzen ari dira Grezia eurogunetik kanpo geratzekotan aplikatzeko, Karel de Gucht Europar Komisariaren arabera.

“Duela urte eta erdi domino efektua egoteko arriskua egon zitekeen”, azpimarratzen du Komisariak, baina, gaur egun Europako Banku Zentralak Grezia eurogunetik ateratzean sortuko ziren larrialdi egoerei aurre egiteko irtenbideetan lan egiten duela aitortu du.

Hala ere, de Gucht Greziak eurogunea uztearen aukerak “ez luke euroaren amaiera ekarriko”; baina zailtasunen hazkundea sortuko luke. Modu honetan, Greziak dituen akordioak betetzea eta eurogunean mantentzea aukera egokiena dela pentsatzen du.

Hildako 6 haurtxoren gorpuak gordetzen zituen gizon bat atxilotu dute

Thailandiar batek, hildako sei haurtxoren gorpuzki gordetzen zituen maleta batean, gero interneten saldu eta sorginkeria-erritualak egiteko.

Hildako sei haurtxoren gorpuak gordetzen zituen gizon bat atxilotu dute. Bangkok hiriko auzo txinatarreko hoteleko gela batean gertatu da. Thailandiako poliziak Choi Hong Hun izeneko 28 urteko taiwandarraren maleta ireki eta sei haurtxoren gorpuzkiak topatu ditu.

Choik onartu duenez, gorpuak 200.000 baht-engatik (5.200 euro) saldu nahi zituen interneten, beste taiwandar baten aginduz.

Poliziak oraindik ez daki gorpuak nondik lapurtu dituen. 2010 urtean, bestalde, abortuetako 2000 jaioberriren umekiak agertu ziren Bangkokeko fraide-barruti batean.

Obama eta Hollande lehen aldiz bilduko dira, G8a aitzakia hartuta

Euroguneko krisia eta Iraneko programa nuklearra izango dira goi-bileraren hizpide nagusiak.

Barack Obama AEBetako presidenteak Etxe Zurian hartuko du Françoise Hollande, Frantziakoa, Europako krisi ekonomikoaz eta Afganistaneko trantsizioaz hitz egiteko, Camp Daviden egingo duten G8aren goi-bileraren atarian.

Obama eta Hollanderen arteko bilera 17:00etan hasiko da eta ondoren Hillary Clinton AEBetako Estatu-idazkariarekin elkarrizketatuko dira.

Gaurkoa presidente atzerritar batekin egingo duen bigarren bilera izango da Hollanderentzat, aste honetan bertan Angela Merkel Alemaniako kantzilerrarekin bildu baita.

Ekainaren 2an III.Nazioarteko FIFA12ko jokalarien Topaketa ospatuko da

Inskripzioaren prezioa bazkideentzat 10 eurokoa izango da eta ez bazkideentzat 12koa.

Ekainaren 2an III. Nazioarteko PlayStation 3ko FIFA12ko jokalarien Topaketa ospatuko da pertsona gorrentzat.. Topaketa Arabako Pertsona Goren elkartean izango da arratsaldeko 16:00etan eta 21:30etan bukaera izango du lunch batekin.

Izena emateko epea maiatzaren 26ra arte izango da zabalik, elkarteari komunikatuz: arabakogorrak@telefonica.net. Inskripzioaren prezioa 10 eurokoa izango da bazkideentzat eta 12 eurokoa bazkide ez direnentzat.